മുഖ്യമന്ത്രിയുടെ വാർത്താസമ്മേളനത്തിൽ നാടകീയ രംഗങ്ങൾ; മാധ്യമപ്രവര്‍ത്തകരോട് 'ചോദിക്കാനുള്ളത് ചോദിക്കണം' എന്ന് പിണറായി വിജയൻ

കൊല്ലം: കൊല്ലത്ത് മുഖ്യമന്ത്രി പിണറായി വിജയൻ നടത്തിയ വാർത്താസമ്മേളനത്തിൽ മാധ്യമപ്രവർത്തകരും മുഖ്യമന്ത്രിയും തമ്മിൽ വാക്കേറ്റവും നാടകീയ രംഗങ്ങളും. ചോദ്യങ്ങൾക്ക് മറുപടി നൽകാതെ മുഖ്യമന്ത്രി എഴുന്നേറ്റു പോയതിനെ മാധ്യമപ്രവർത്തകർ കൂട്ടമായി ചോദ്യം ചെയ്തതോടെ അദ്ദേഹം തിരികെ വന്ന് മറുപടി നൽകി. വാർത്താസമ്മേളനം തുടങ്ങി കുറഞ്ഞ സമയത്തിനുള്ളിൽ തന്നെ മറുപടികൾ അവസാനിപ്പിച്ച് മുഖ്യമന്ത്രി മടങ്ങാൻ ഒരുങ്ങിയതാണ് പ്രതിഷേധത്തിന് കാരണമായത്. എസ്ഡിപിഐ-സിപിഐ ഡീൽ ആരോപണം ഉൾപ്പെടെയുള്ള നിർണ്ണായക വിഷയങ്ങൾ ഉന്നയിക്കാൻ മാധ്യമപ്രവർത്തകർ ശ്രമിക്കുന്നതിനിടെയായിരുന്നു ഈ സംഭവങ്ങൾ.

കൈരളി ടിവിയിൽ നിന്നുള്ള രണ്ട് ചോദ്യങ്ങൾക്കും ദേശാഭിമാനിയിൽ നിന്നുള്ള ഒരു ചോദ്യത്തിനും മറുപടി നൽകിയ ശേഷം "ഇന്നത്തെ സമയം കഴിഞ്ഞു, ഇനി നാളെയാകാം" എന്ന് പറഞ്ഞ് മുഖ്യമന്ത്രി എഴുന്നേറ്റു. ഇനിയും ചോദ്യങ്ങളുണ്ടെന്നും മറുപടി വേണമെന്നും മാധ്യമപ്രവർത്തകർ വിളിച്ചു പറഞ്ഞു. എന്നാൽ ഇത് ശ്രദ്ധിക്കാതെ മുഖ്യമന്ത്രി പുറത്തേക്ക് നടന്നു. ഇതോടെ "ഇങ്ങനെയാണെങ്കിൽ ഞങ്ങളെ വാർത്താസമ്മേളനത്തിന് വിളിക്കണോ?" എന്ന് മാധ്യമപ്രവർത്തകർ ഒന്നടങ്കം ചോദിച്ചു. പ്രതിഷേധം കനത്തതോടെ പുറത്തേക്ക് പോയ മുഖ്യമന്ത്രി തിരികെ വന്ന് കസേരയിലിരുന്നു. ചോദ്യങ്ങൾ മനസ്സിലുണ്ടായാൽ പോരെന്നും അത് ചോദിക്കണമെന്നും താൻ മറുപടി നൽകുമെന്നും അദ്ദേഹം പറഞ്ഞു.

താൻ മറുപടി നൽകിയ മാധ്യമപ്രവർത്തകർ ഏത് സ്ഥാപനത്തിൽ നിന്നുള്ളവരാണെന്ന് നോക്കിയല്ല സംസാരിച്ചതെന്ന് മുഖ്യമന്ത്രി വ്യക്തമാക്കി. നിശ്ചിത സമയം കഴിഞ്ഞതിനാലാണ് വാർത്താസമ്മേളനം അവസാനിപ്പിക്കാൻ ശ്രമിച്ചതെന്ന് അദ്ദേഹം വിശദീകരിച്ചു. തിരികെ എത്തിയ ശേഷം മാധ്യമപ്രവർത്തകരുടെ ബാക്കി ചോദ്യങ്ങൾക്കും അദ്ദേഹം മറുപടി നൽകി.