വെറും വയറ്റിലെ കാപ്പി കുടി സന്ധിവേദന വർധിപ്പിക്കുമോ? അറിയേണ്ട കാര്യങ്ങൾ

രാവിലെ എഴുന്നേറ്റ ഉടൻ ഒരു കപ്പ് കാപ്പി കുടിക്കുന്നത് പലർക്കും ഉന്മേഷം നൽകുന്ന ശീലമാണ്. കാപ്പിയിലെ കഫീൻ താൽക്കാലികമായി തലച്ചോറിനെ ഉണർത്തുകയും ഊർജ്ജം നൽകുകയും ചെയ്യുമെങ്കിലും, വെറും വയറ്റിൽ ഇത് കുടിക്കുന്നത് ആരോഗ്യത്തിന് ദോഷകരമാകുമെന്ന് വിദഗ്ധർ മുന്നറിയിപ്പ് നൽകുന്നു. പ്രത്യേകിച്ച് സന്ധിവേദനയുള്ളവർ ഈ ശീലം ഒഴിവാക്കുന്നതാണ് നല്ലത്.

വെറും വയറ്റിൽ കാപ്പി കുടിക്കുന്നത് ശരീരത്തിലെ വീക്കം വർധിപ്പിക്കാൻ കാരണമാകും. ഇത് താഴെ പറയുന്ന പ്രശ്നങ്ങളിലേക്ക് നയിക്കാം. സന്ധികളിൽ കാഠിന്യവും വേദനയും വർധിക്കാൻ ഇത് കാരണമാകുന്നു. ഉറക്കത്തിന് ശേഷം ശരീരത്തിൽ സ്വാഭാവികമായും നേരിയ നിർജ്ജലീകരണം ഉണ്ടാകാറുണ്ട്. ഈ സമയത്ത് കാപ്പി കുടിക്കുന്നത് നിർജ്ജലീകരണം വഷളാക്കുകയും സന്ധികളുടെ സുഗമമായ പ്രവർത്തനത്തെ ബാധിക്കുകയും ചെയ്യുന്നു.

അമിതമായ കാപ്പി കുടി ശരീരത്തിലെ കാൽസ്യത്തിന്റെ ആഗിരണത്തെ തടസ്സപ്പെടുത്തുന്നു. എല്ലുകളുടെ സാന്ദ്രത കുറയുന്നതിനും ബലക്ഷയത്തിനും ഇത് കാരണമായേക്കാം. 35 വയസ്സിന് മുകളിലുള്ളവർ, ആർത്തവവിരാമത്തോട് അടുക്കുന്ന സ്ത്രീകൾ, വിറ്റാമിൻ ഡി കുറവുള്ളവർ എന്നിവർ ഇക്കാര്യത്തിൽ പ്രത്യേക ശ്രദ്ധ പുലർത്തണം.

കാപ്പി പൂർണ്ണമായി ഒഴിവാക്കണമെന്നല്ല ഇതിനർത്ഥം, മറിച്ച് അത് കുടിക്കുന്ന സമയം ക്രമീകരിക്കുകയാണ് വേണ്ടത്. രാവിലെ ഒരു ഗ്ലാസ് ചെറുചൂടുവെള്ളം കുടിച്ചു കൊണ്ട് ദിവസം ആരംഭിക്കുക. ലഘുഭക്ഷണത്തിന് ശേഷമോ അല്ലെങ്കിൽ ശരീരത്തിൽ ജലാംശം എത്തിയ ശേഷമോ കാപ്പി കുടിക്കുന്നതാണ് ഉചിതം. നിസ്സാരമെന്ന് തോന്നുന്ന ഇത്തരം മാറ്റങ്ങൾ സന്ധികളുടെ ആരോഗ്യത്തിൽ വലിയ മാറ്റങ്ങൾ കൊണ്ടുവരുമെന്ന് പഠനങ്ങൾ സൂചിപ്പിക്കുന്നു.