പശ്ചിമേഷ്യയിൽ വെടിനിർത്തൽ: വിജയമവകാശപ്പെട്ട് യുഎസും ഇറാനും; നിർണ്ണായക ചർച്ചകൾ ഏപ്രിൽ 11-ന്

ടെഹ്‌റാൻ/വാഷിങ്ടൺ: പശ്ചിമേഷ്യൻ സംഘർഷത്തിൽ രണ്ടാഴ്ചത്തെ വെടിനിർത്തൽ പ്രഖ്യാപിച്ചതിന് പിന്നാലെ, തങ്ങൾ വിജയിച്ചെന്ന അവകാശവാദവുമായി അമേരിക്കയും ഇറാനും രംഗത്തെത്തി. ഇറാനിയൻ ജനതയ്ക്കെതിരായ 'നിയമവിരുദ്ധ യുദ്ധത്തിൽ' ശത്രുവിന് ചരിത്രപരമായ പരാജയം സംഭവിച്ചുവെന്ന് ഇറാന്റെ പരമോന്നത ദേശീയ സുരക്ഷാ കൗൺസിൽ പ്രസ്താവനയിൽ അവകാശപ്പെട്ടു.

അമേരിക്കയെ തങ്ങളുടെ പത്തിന ഉപാധികൾ അംഗീകരിപ്പിക്കാൻ നിർബന്ധിതരാക്കിയതാണ് വലിയ വിജയമായി ഇറാൻ ഉയർത്തിക്കാട്ടുന്നത്. ഈ നിബന്ധനകൾ ചർച്ചകളിലൂടെ പൂർണ്ണമായി അംഗീകരിക്കപ്പെട്ടാൽ മാത്രമേ യുദ്ധം അവസാനിപ്പിക്കാൻ തയ്യാറാവുകയുള്ളൂ എന്ന് സുരക്ഷാ കൗൺസിൽ വ്യക്തമാക്കിയിട്ടുണ്ട്.

വിജയത്തിൽ ഇറാൻ ജനതയെ അഭിനന്ദിച്ച കൗൺസിൽ, വിശദാംശങ്ങൾ അന്തിമമാകുന്നത് വരെ ക്ഷമയും വിവേകവും പുലർത്തണമെന്നും ജനങ്ങൾ ഒറ്റക്കെട്ടായി നിൽക്കണമെന്നും അഭ്യർത്ഥിച്ചു.പാകിസ്താൻ പ്രധാനമന്ത്രി ഷെഹബാസ് ഷെരീഫിന്റെ മധ്യസ്ഥതയിലാണ് സമാധാന ചർച്ചകൾ പുരോഗമിക്കുന്നത്.

ഏപ്രിൽ 11-ന് പാകിസ്താനിലെ ഇസ്ലാമാബാദിൽ വെച്ച് ഇറാന്റെ ഉപാധികളിൽമേൽ ഔദ്യോഗിക ചർച്ചകൾ ആരംഭിക്കും. ചർച്ചകൾ വിജയകരമാവുകയാണെങ്കിൽ നിലവിലെ വെടിനിർത്തൽ കാലാവധി നീട്ടാനും സാധ്യതയുണ്ട്. ഇരുരാജ്യങ്ങളിലെയും പ്രതിനിധികളെ ഷെഹബാസ് ഷെരീഫ് പാകിസ്താനിലേക്ക് സ്വാഗതം ചെയ്തിട്ടുണ്ട്.

"ഇറാൻ പത്ത് നിർദ്ദേശങ്ങൾ മുന്നോട്ട് വെച്ചിട്ടുണ്ടെന്നും തുടർന്നുള്ള ചർച്ചകൾ ഇതിനെ അടിസ്ഥാനമാക്കിയായിരിക്കുമെന്നും യുഎസ് പ്രസിഡന്റ് ഡൊണാൾഡ് ട്രംപ് സ്ഥിരീകരിച്ചു."