യുഎഇ ആകാശത്ത് മോദിക്ക് എഫ്-16 പോർവിമാനങ്ങളുടെ അകമ്പടി; അബുദാബിയിൽ ചരിത്ര സ്വീകരണം

അബുദാബി: അഞ്ച് രാജ്യങ്ങളിലേക്കുള്ള തന്റെ ഔദ്യോഗിക പര്യടനത്തിന്റെ ആദ്യ ഘട്ടമായി യുഎഇയിലെത്തിയ ഇന്ത്യൻ പ്രധാനമന്ത്രി നരേന്ദ്ര മോദിക്ക് ചരിത്രപരമായ സ്വീകരണമാണ് അബുദാബിയിൽ ലഭിച്ചത്. പ്രധാനമന്ത്രി സഞ്ചരിച്ച വിമാനം യുഎഇ വ്യോമാതിർത്തിയിൽ പ്രവേശിച്ച ഉടൻ തന്നെ യുഎഇ വ്യോമസേനയുടെ എഫ്-16 പോർവിമാനങ്ങൾ സുരക്ഷയൊരുക്കി അകമ്പടി സേവിച്ചു. വിമാനത്താവളം വരെ നീണ്ട ഈ അസാധാരണ സൈനിക അകമ്പടി ഇന്ത്യയിലെ ജനങ്ങൾക്കുള്ള വലിയ ബഹുമതിയാണെന്ന് യുഎഇ പ്രസിഡന്റ് ഷെയ്ഖ് മുഹമ്മദ് ബിൻ സായിദ് അൽ നഹ്യാനുമായി നടത്തിയ കൂടിക്കാഴ്ചയിൽ പ്രധാനമന്ത്രി നരേന്ദ്ര മോദി കൃതജ്ഞതയോടെ സ്മരിച്ചു.

​അബുദാബി വിമാനത്താവളത്തിൽ നേരിട്ടെത്തി സ്വീകരിച്ച യുഎഇ പ്രസിഡന്റിനോടുള്ള പ്രത്യേക നന്ദി മോദി സമൂഹമാധ്യമങ്ങളിലൂടെ പങ്കുവെക്കുകയും കൂടിക്കാഴ്ചയിലെ വലിയ സന്തോഷം പ്രകടിപ്പിക്കുകയും ചെയ്തു. ഇരുഭരണാധികാരികളും തമ്മിൽ നടത്തിയ ഉഭയകക്ഷി ചർച്ചകൾക്കൊടുവിൽ ഇന്ത്യയും യുഎഇയും തമ്മിലുള്ള തന്ത്രപരമായ ബന്ധം കൂടുതൽ ദൃഢമാക്കുന്ന നിർണായക കരാറുകളിൽ ഇരുരാജ്യങ്ങളും ഒപ്പുവെച്ചു. പെട്രോളിയം, എൽപിജി വിതരണം ഉൾപ്പെടെയുള്ള ഊർജ്ജ മേഖലകളിലെ പ്രധാന കരാറുകളാണ് ഈ സന്ദർശനത്തിൽ ഇരുരാജ്യങ്ങളും കൈമാറിയത്.