കൗതുകങ്ങളും ദുരൂഹതകളും സസ്പെൻസുകളുമായി 'സംശയം' എത്തുന്നു

കൊച്ചി: ഒരു സംശയം, പരിധിയില്ലാത്ത ആനന്ദം, അനന്തമായ ആശയക്കുഴപ്പം (One doubt, Unlimited fun, Endless confusion) എന്ന ടാഗ് ലൈനോടെ ഒരു ചിത്രമെത്തുന്നു- 'സംശയം'. സിനിമയുടെ ഈ ടാഗ് ലൈൻ തന്നെ ഏറെ കൗതുകം ഉളവാക്കുന്നതാണ്.

മുഴുനീള ഫാമിലി എൻ്റർടൈനർ ആയി അവതരിപ്പിക്കുന്ന ഈ സിനിമയ്ക്ക് രാജേഷ് രവിയാണ് തിരക്കഥ രചിച്ച് സംവിധാനം ചെയ്യുന്നത്.

ബിജു മേനോൻ, ഷറഫുദ്ദീൻ,പാർവ്വതി തെരുവോത്ത് എന്നിവർ അഭിനയിച്ച് മികച്ച അഭിപ്രായവും വിജയവും നേടിയ 'ആർക്കറിയാം' എന്ന ചിത്രത്തിൻ്റെ തിരക്കഥാകൃത്തുകൂടിയാണ് രാജേഷ് രവി.

കഥയിലും അഭിനേതാക്കളിലും അണിയറ പ്രവർത്തകരിലുമൊക്കെ വലിയ സസ്പെൻസ് നിലനിർത്തിക്കൊണ്ടാണ് ചിത്രത്തിൻ്റെ ആദ്യ അപ്ഡേറ്റ് പുറത്തുവിട്ടിരിക്കുന്നത്. ചിത്രത്തിൻ്റെ മറ്റു വിവരങ്ങൾ ഉടൻ തന്നെ പുറത്തുവിടുമെന്ന് അണിയറ പ്രവർത്തകർ പറയുന്നു.

1985 സ്റ്റുഡിയോസിൻ്റെ ബാനറിൽ സുരാജ്.പി.എസ്, ഡിക്സൻ പൊടുത്താമ്പ്, ലിനോ ഫിലിപ്പ് എന്നിവരാണ് 'സംശയം' നിർമ്മിക്കുന്നത്. ഹിഷാം അബ്ദുൾ വഹാബിൻ്റെ മാന്ത്രിക സംഗീതമാണ് സിനിമയുടെ മറ്റൊരു ആകർഷകകേന്ദ്രം.