ലോകം കീഴടക്കിയ ഇന്ത്യൻ കൗമാരപ്പടയ്ക്ക് ബി.സി.സി.ഐയുടെ വമ്പൻ സമ്മാനം; 7.5 കോടി രൂപ നൽകും

മുംബൈ: അണ്ടർ 19 ഏകദിന ലോകകപ്പ് ഫൈനലിൽ ഇംഗ്ലണ്ടിനെ തകർത്ത് കിരീടം നേടിയ ഇന്ത്യൻ ടീമിന് ബിസിസിഐ 7.5 കോടി രൂപ സമ്മാനത്തുക പ്രഖ്യാപിച്ചു. ആയുഷ് മാത്രെയുടെ നേതൃത്വത്തിലുള്ള ടീമിന്റെ ഉജ്ജ്വല പ്രകടനത്തിനുള്ള അംഗീകാരമായാണ് ഈ വലിയ തുക നൽകുന്നത്.

ഇന്ത്യയുടെ ആറാം അണ്ടർ 19 ലോകകപ്പ് കിരീടമാണിത്. 2022-ൽ കിരീടം നേടിയപ്പോൾ ഓരോ കളിക്കാരനും 40 ലക്ഷം രൂപ വീതമാണ് ബിസിസിഐ നൽകിയിരുന്നത്. എന്നാൽ ഇത്തവണ തുകയിൽ വൻ വർദ്ധനവ് വരുത്തിയിട്ടുണ്ട്. വളർന്നുവരുന്ന താരങ്ങളുടെ പോരാട്ടമായതിനാൽ അണ്ടർ 19 ലോകകപ്പ് വിജയികൾക്ക് ഐസിസി (ICC) നേരിട്ട് സമ്മാനത്തുക നൽകാറില്ല.

വൈഭവ് സൂര്യവംശിയുടെ വിസ്മയ ബാറ്റിംഗ്: വെറും 14 വയസുകാരനായ വൈഭവ് സൂര്യവംശിയുടെ തകർപ്പൻ സെഞ്ചുറിയാണ് ഇന്ത്യയ്ക്ക് കരുത്തായത്. 80 പന്തിൽ നിന്ന് 15 വീതം ഫോറും സിക്സറും സഹിതം 175 റൺസ് താരം അടിച്ചുകൂട്ടി. ഇന്ത്യ നിശ്ചിത 50 ഓവറിൽ 411 റൺസ് എന്ന റെക്കോർഡ് സ്കോർ പടുത്തുയർത്തി. മറുപടി ബാറ്റിംഗിനിറങ്ങിയ ഇംഗ്ലണ്ട് 40.2 ഓവറിൽ 311 റൺസിന് പുറത്തായി. 100 റൺസിന്റെ ആധികാരിക ജയത്തോടെയാണ് ഇന്ത്യ വീണ്ടും ലോകത്തിന്റെ നെറുകയിലെത്തിയത്.