പയ്യന്നൂർ ചുവപ്പ് വിട്ടു; അരലക്ഷം വോട്ടിന്റെ ഭൂരിപക്ഷം മറികടന്ന് വി. കുഞ്ഞികൃഷ്ണന് ചരിത്ര വിജയം

പയ്യന്നൂർ: കണ്ണൂരിലെ കമ്മ്യൂണിസ്റ്റ് കോട്ടകളിൽ ഇടിമിന്നൽ പിണർ പോലെ രാഷ്ട്രീയ അട്ടിമറി. സിപിഎം വിട്ട് യുഡിഎഫ് സ്വതന്ത്രനായി മത്സരിച്ച വി. കുഞ്ഞികൃഷ്ണൻ 7,487 വോട്ടുകളുടെ ഭൂരിപക്ഷത്തിൽ പയ്യന്നൂർ പിടിച്ചെടുത്തു. മുൻ സിപിഎം ഏരിയ സെക്രട്ടറി കൂടിയായ കുഞ്ഞികൃഷ്ണന്റെ വിജയം ദശാബ്ദങ്ങളായി പയ്യന്നൂരിൽ തുടരുന്ന ചുവപ്പ് ആധിപത്യത്തിന് അന്ത്യം കുറിച്ചു.

വോട്ട് നില ഇങ്ങനെ:

• വി. കുഞ്ഞികൃഷ്ണൻ (UDF സ്വതന്ത്രൻ): 76,640 വോട്ടുകൾ

• ടി.ഐ. മധുസൂദനൻ (LDF): 69,153 വോട്ടുകൾ

അവിശ്വസനീയം ഈ തിരിച്ചടി 2021-ൽ 49,780 വോട്ടുകളുടെ റെക്കോർഡ് ഭൂരിപക്ഷത്തിൽ ജയിച്ച ടി.ഐ. മധുസൂദനനാണ് ഇത്തവണ കുഞ്ഞികൃഷ്ണന് മുന്നിൽ അടിപതറിയത്. കഴിഞ്ഞ തവണ 93,695 വോട്ടുകൾ നേടിയ മധുസൂദനന്റെ വോട്ടുകൾ ഇത്തവണ 69,153 ആയി കുത്തനെ ഇടിഞ്ഞു. 2021-ൽ ഏറ്റവും കൂടുതൽ വോട്ടിന്റെ ഭൂരിപക്ഷം നേടി ചരിത്രം കുറിച്ച സ്ഥാനാർത്ഥി തന്നെയാണ് ഇത്തവണ ദയനീയമായി പരാജയപ്പെട്ടത്.

തിരുത്തൽ ശക്തിയായി കുഞ്ഞികൃഷ്ണൻ പാർട്ടിക്കുള്ളിലെ ഫണ്ട് തിരിമറികൾക്കെതിരെ കലഹിച്ച് പുറത്തുവന്ന കുഞ്ഞികൃഷ്ണൻ, അണികളുടെ ഇടയിലുണ്ടായ അതൃപ്തി വോട്ടാക്കി മാറ്റുന്നതിൽ വിജയിച്ചു. പി.കെ. ശ്രീമതി ടീച്ചറും സി. കൃഷ്ണനും അരക്കിട്ടുറപ്പിച്ച സിപിഎം കോട്ടയിൽ ഇതാദ്യമായാണ് ഇത്ര വലിയൊരു വിള്ളൽ വീഴുന്നത്. ഓരോ തിരഞ്ഞെടുപ്പ് കഴിയുന്തോറും സിപിഎം വോട്ടുകൾ വർദ്ധിപ്പിച്ചിരുന്ന പയ്യന്നൂരിൽ, അണികൾ നേതൃത്വത്തെ തിരുത്തിയെന്ന വി. കുഞ്ഞികൃഷ്ണന്റെ വാക്കുകൾ അക്ഷരാർത്ഥത്തിൽ ഫലിച്ചു.

കണ്ണൂരിലെ മറ്റ് മണ്ഡലങ്ങളിലും യുഡിഎഫ് വലിയ തോതിൽ മുന്നേറുന്നതിനിടയിൽ പയ്യന്നൂരിലെ ഈ ജയം ഇടതുപക്ഷത്തിന് അപ്രതീക്ഷിതവും എന്നാൽ അതിശക്തവുമായ ആഘാതമാണ് നൽകിയിരിക്കുന്നത്.