റെക്കോർഡുകൾ വഴിമാറുന്നു; ഐപിഎല്ലിൽ 5000 റൺസ് തികച്ച് സഞ്ജു സാംസൺ, റെയ്നയെ മറികടന്നു

ചെന്നൈ: ഇന്ത്യൻ പ്രീമിയർ ലീഗിൽ ചരിത്രനേട്ടം സ്വന്തമാക്കി ചെന്നൈ സൂപ്പര്‍ കിങ്സ് താരം സഞ്ജു സാംസൺ. ഐപിഎല്ലിൽ 5000 റൺസ് തികയ്ക്കുന്ന പത്താമത്തെ താരമെന്ന ബഹുമതിയാണ് സഞ്ജു സ്വന്തമാക്കിയത്. ഞായറാഴ്ച ചെപ്പോക്ക് സ്റ്റേഡിയത്തിൽ നടന്ന മത്സരത്തിലാണ് സഞ്ജു ഈ നാഴികക്കല്ല് പിന്നിട്ടത്.

ഏറ്റവും കുറഞ്ഞ പന്തുകളിൽ നിന്ന് 5000 റൺസ് തികയ്ക്കുന്ന ഇന്ത്യൻ താരമെന്ന റെക്കോർഡ് ഇനി സഞ്ജുവിന് സ്വന്തം. സഞ്ജു സാംസൺ: 3555 പന്തുകൾ, സുരേഷ് റെയ്ന: 3620 പന്തുകൾ. അന്താരാഷ്ട്ര താരങ്ങളിൽ എ.ബി. ഡിവില്ലിയേഴ്സ് (3288), ഡേവിഡ് വാർണർ (3554) എന്നിവർ മാത്രമാണ് സഞ്ജുവിനേക്കാൾ വേഗത്തിൽ ഈ നേട്ടത്തിലെത്തിയത്. 180 ഇന്നിങ്സുകളിൽ നിന്നാണ് സഞ്ജു ഈ നേട്ടം കൈവരിച്ചത്. 130 ഇന്നിങ്സുകളിൽ നിന്ന് 5000 റൺസ് എടുത്ത കെ.എൽ. രാഹുലാണ് ഇന്നിങ്സുകളുടെ അടിസ്ഥാനത്തിൽ ഈ പട്ടികയിൽ മുന്നിൽ.

റെക്കോർഡ് നേട്ടം സ്വന്തമാക്കിയെങ്കിലും മത്സരത്തിൽ സഞ്ജുവിന് തിളങ്ങാനായില്ല. 15 പന്തിൽ വെറും 11 റൺസെടുത്ത് താരം പുറത്തായി. ഇന്നിങ്സിന്റെ രണ്ടാം ഓവറിൽ കഗീസോ റബാദയുടെ പന്തിൽ വിക്കറ്റ് കീപ്പർ ജോസ് ബട്‍ലർക്ക് ക്യാച്ച് നൽകിയാണ് സഞ്ജു മടങ്ങിയത്.