രാജിക്ക് പിന്നാലെ പ്രൊഫൈൽ തിരുത്തി പ്രധാൻ

ന്യൂഡൽഹി ∙ കേന്ദ്ര വിദ്യാഭ്യാസ മന്ത്രി സ്ഥാനം രാജിവച്ചതിന് പിന്നാലെ ധർമേന്ദ്ര പ്രധാൻ സമൂഹമാധ്യമ അക്കൗണ്ടുകളിലെ വിവരങ്ങളിൽ മാറ്റം വരുത്തി. എക്സ് അക്കൗണ്ടിൽ 'കേന്ദ്ര വിദ്യാഭ്യാസ മന്ത്രി' എന്നതിന് പകരം 'പാർലമെന്റ് അംഗം, സാംബൽപുർ' എന്നാണ് അദ്ദേഹം പ്രൊഫൈൽ പുതുക്കിയത്.

ശനിയാഴ്ച ഉച്ചയോടെയാണ് ധർമേന്ദ്ര പ്രധാൻ മന്ത്രിസ്ഥാനം രാജിവച്ചത്. രാജിക്കത്തിന്റെ ചിത്രവും അദ്ദേഹം എക്സിൽ പങ്കുവെച്ചിരുന്നു.

ജന്തർ മന്തറിലും രാജ്യത്തിന്റെ വിവിധ ഭാഗങ്ങളിലുമായി രൂപപ്പെട്ട സാഹചര്യം ദേശവിരുദ്ധ ശക്തികൾ മുതലെടുക്കരുതെന്നും രാജ്യത്തിന്റെ ഐക്യം സംരക്ഷിക്കപ്പെടണമെന്നും രാജിക്കത്തിൽ പ്രധാൻ വ്യക്തമാക്കിയിരുന്നു.

അതേസമയം, പ്രധാന്റെ രാജിക്ക് പിന്നാലെ കേന്ദ്രസർക്കാരുമായി സിജെപി നേതാക്കൾ നടത്തിയ ചർച്ച വിജയകരമായി പൂർത്തിയായി. ഇതോടെ ജന്തർ മന്തറിൽ നടന്നുവരികയായിരുന്ന സമരം അവസാനിപ്പിക്കുകയാണെന്ന് സിജെപി പ്രഖ്യാപിച്ചു.