കല്യാണം മുടക്കികളുടെ കഥപറയുന്ന 'വത്സലാ ക്ലബ്ബ്' എന്ന സിനിമയുടെ ഫസ്റ്റ് ലുക്ക് പോസ്റ്റർ പുറത്തിറങ്ങി

തിരുവനന്തപുരം: ഫാൽക്കൺ സിനിമാസിൻ്റെ ബാനറിൽ ജിനി. എസ്. നിർമ്മിച്ച് നവാഗതനായ അനുഷ് മോഹൻ സംവിധാനം ചെയ്യുന്ന വത്സലാ ക്ലബ്ബ് എന്ന ചിത്രത്തിൻ്റെ ഫസ്റ്റ് ലുക്ക് പോസ്റ്റർ പുറത്തിറങ്ങി.
തിരുവനന്തപുരത്തും പരിസരങ്ങളിലുമായി ഈ ചിത്രത്തിൻ്റെ ചിത്രീകരണം പുരോഗമിക്കുന്നതിനിടയിലാണ് ആദ്യ അനൗൺസ്മെന്റായി ഫസ്റ്റ് ലുക്ക് പോസ്റ്റർ പുറത്തുവന്നിരിക്കുന്നത്.

ഭാരതക്കുന്ന് എന്ന സാങ്കൽപ്പിക ഗ്രാമത്തിലാണ് കഥ നടക്കുന്നത്. വർഷങ്ങളായി ഈ ഗ്രാമത്തിൽ നിലനിന്നു പോരുന്ന ഒരു കാര്യമാണ് വിവാഹം മുടക്കൽ. അവർക്ക് ഇത് മത്സരവും ആഘോഷവും പോലെയാണ്. ആൺ-പെൺ വ്യത്യാസമില്ലാതെ തലമുറതലമുറയായി ഈ കാര്യം കൈമാറി നിലനിന്നു പോരുന്നു. സ്വന്തം മക്കളുടെ വിവാഹം പോലും മുടക്കുന്നതിൽ ഇവർക്ക് തെല്ലും ദുഃഖമില്ല.

ഏറ്റവും കൂടുതൽ കല്യാണം മുടക്കുന്നവർക്ക് മുടക്കു ദണ്ഡ് എന്ന പാരിതോഷികവും നൽകുന്നു. ഇവിടെ വത്സലാ ക്ലബ്ബ് എന്ന ഒരു ക്ലബ്ബ് പ്രവർത്തിക്കുന്നുണ്ട്. നാട്ടിൽ നടക്കുന്ന കല്യാണം മുടക്കലിനെ ശക്തമായി എതിർക്കുന്ന ഏതാനും ചെറുപ്പക്കാരാണ് ക്ലബ്ബിൻ്റെ സജീവ പ്രവർത്തകർ. ഈ പ്രശ്നത്തിൻ്റെ പേരിൽ ക്ലബ്ബ് പ്രവർത്തകരും നാട്ടുകാരും രണ്ടു ചേരികളിലായി. തുടർന്ന് ഇവർക്കിടയിലേയ്ക്ക് ഒരു പെൺകുട്ടി കടന്നു വരുന്നതോടെ കഥാഗതിയിൽ വലിയൊരു വഴിത്തിരിവിനു വഴിയൊരുക്കുന്നു. ഇതാണ് ചിത്രത്തിന്റെ രസകരമായ ഇതിവൃത്തം.

ഈ ചിത്രത്തിലൂടെ തികച്ചും കൗതുകകരമായ ഒരു പ്രമേയം ഹ്യൂമർ, ഫാൻ്റസി ജോണറിൽ അവതരിപ്പിക്കുകയാണ് ഇതിന്റെ അണിയറ പ്രവർത്തകർ.

സാധാരണക്കാർ താമസിക്കുന്ന ഒരു ഗ്രാമ പശ്ചാത്തലത്തിലൂടെയാണ് ചിത്രത്തിൻ്റെ അവതരണം. താരപ്പൊലിമയേക്കാളുപരി കഥക്കനുയോജ്യമായതും ഒപ്പം സമീപകാല മലയാള സിനിമകളിലൂടെ ശ്രദ്ധേയരായവരുമാണ് വത്സലാ ക്ലബ്ബിലെ അഭിനേതാക്കൾ.

വിനീത് തട്ടിൽ, അഖിൽ കവലയൂർ, കാർത്തിക്ക് ശങ്കർ, രൂപേഷ് പീതാംബരൻ, അരിസ്റ്റോ സുരേഷ്, അംബി, വിശാഖ്, ഗൗരി, മല്ലികാസുകുമാരൻ, ജിബിൻ ഗോപിനാഥ്, അനിൽ രാജ്, അരുൺ പോൾ, ദീപുകരുണാകരൻ, പ്രിയാ ശ്രീജിത്ത്, ബിനോജ് കുളത്തൂർ, രാഹുൽ നായർ, ദീപു നാവായിക്കുളം, അനീഷ്, ഗൗതം.ജി.ശശി, അസീന റീന, അരുൺ ഭാസ്ക്കർ, ആമി തിലക് എന്നിവരാണ് ചിത്രത്തിലെ കേന്ദ്ര കഥാപാത്രങ്ങളെ അവതരിപ്പിക്കുന്നത്.

ധ്യാൻ ശ്രീനിവാസൻ ഈ ചിത്രത്തിലെ മറ്റൊരു മുഖ്യ കഥാപാത്രത്തെ അവതരിപ്പിക്കുന്നു.

രചന- ഫൈസ് ജമാൽ.
സംഗീതം- ജിനി എസ്.
ഛായാഗ്രഹണം- ശൗരിനാഥ്.
എഡിറ്റിംഗ്- രാകേഷ് അശോക.
കലാസംവിധാനം- അജയ് ജി. അമ്പലത്തറ.
സ്റ്റിൽസ്- അജി മസ്ക്കറ്റ്.
മേക്കപ്പ്- സന്തോഷ് വെൺപകൽ.
കോസ്റ്റ്യും ഡിസൈൻ- ബ്യൂസി ബേബി ജോൺ.
ഡിസൈൻ- ആനന്ദ് രാജേന്ദ്രൻ.
ചീഫ് അസ്സോസ്സിയേറ്റ് ഡയറക്ടർ- അനുരാജ് ഡി.സി.
പ്രൊഡക്ഷൻ മാനേജർ- കുര്യൻ ജോസഫ്. 
പ്രാഡക്ഷൻ എക്സിക്കുട്ടീവ്- ഹരി കാട്ടാക്കട.
പ്രൊഡക്ഷൻ കൺട്രോളർ- മുരുകൻ.എസ്.
പി.ആർ.ഒ- വാഴൂർ ജോസ്.